साजन परियार, पर्वत– आफ्ना छोराछोरीले न्यानो लुगा पाउने भएपछि शुक्रवार जनता निम्न मा.वि खानीगाउँमा अभिभावकहरुको भीड लाग्यो । अन्य समयमा कम मात्रामा उपस्थिती हुने अभिभावकहरुको भीडले विद्यालयको रैनकै फेरिएको थियो । बस्ती भन्दा केही पर रहेको विद्यालयमा ठुलै मेला लागेको जस्तो देखिन्थ्यो ।

कपडा वितरणको खवर पाएका विद्यार्थीहरु हाम्रो गाडीको हरान बजाउँदा साथ कक्षा नै छोडेर आए । नयाँ लुगा पाउने आशमा बसेकाहरु विद्यार्थी सुईटर पाएसँगै खुशीले गद्गद भए । सन्तानले नयाँ लुगा पाएपछि अभिभावकहरु खुशी भएका थिए । जाडोयाम सुरु भएसँगै विद्यालयमा जाने विद्यार्थीको संख्या कम हुन्छ । जाडोमा लगाउने लुगाको अभाव भएपछि विद्यालयका विद्यार्थीहरुलाई राहात मिलेको विद्यालयका प्रधानाध्यापक बैकुण्ठ श्रेष्ठले बताए ।

विद्यार्थीलाई चिसोबाट बचाउन न्यानो कपडा वितरण गरेको श्रेष्ठको भनाई छ । मिलन ट्रष्ट २०७४ को मुख्य प्रायोजक र पत्रकार साजन परियारको विशेष पहलमा त्यहाँ रहेका ७५ जना विद्यार्थीलाई न्यानो कपडा वितरण गरेको हो । उक्त कार्यक्रममा समाजसेवी उज्वल गुरुङ, पर्वत वेलफेर सोसाईटी यूकेका बरिष्ठ उपाध्याक्ष बिनोद पुरी, महासचिव भरत पौड्याल, पर्वत सेवा समाज जापानका अध्यक्ष सुजन जोशी र नेपाली विद्यार्थी संघ गुप्तेश्वर बहुमुखी क्याम्पसका अध्यक्ष शिशिर शर्मा पौडेलले सहयोग गर्नुभएको थियो ।

विद्यालय व्यवस्थापन समितिका अध्यक्ष विनोद सापकोटाको अध्यक्षतामा सम्पन्न भएको कार्यक्रममा बोल्दै फलेवास नगरपालिका–५ खानीगाउँकी वडा सदस्य केशकुमारी दमाईले विद्यार्थीलाई न्यानो कपडाले राहात मिलेको बताउनुभयो । कार्यक्रममा पत्रकार तथा कार्यक्रम संयोजक साजन परियारले आफुले पत्रकारिता सँगै समाजसेवालाई अगडी बढाएको भन्दै आफ्नो अभियानमा साथ दिन सबैलाई आग्रह गर्नुभयो ।

कार्यक्रममा मिलन ट्रष्टकी प्रतिनिधी बालकाशी गुरुङ, जनप्रशासन क्याम्पसका स्ववियु सभापति पंकज क्षेत्री, अभिभावक चित्रप्रसाद सापकोटा लगायतले यस्ता कार्यक्रमलाई निरन्तरता दिनुपर्ने बताउनु भएको थियो । उक्त कार्यक्रममा स्वागत मन्तव्य शिक्षिका इन्द्र तिवारी र कार्यक्रमको संचालन विद्यालयका प्रधानाध्यापक बैकुण्ठ श्रेष्ठले गर्नुभएको थियो ।