फागुन २९ पर्वत । पर्वतको मोदी गाउँपालिका २ को पातीचौर बजार र आसपासको बस्तीलाई खोलाको कटानबाट जोगाउन पर्खाल निर्माण गर्न थालिएको छ । वर्षेनी पातिखोलामा आउने बाढिका कारण पातीचौर बजार उच्च जोखिममा रहेको छ । पातीखोलाको किनारमा ५ करोडको लागतमा पर्खाल लगाउन थालिएको हो । पर्खाल निर्माण पछि खोलाको कटानबाट बजारक्षेत्र, सडक, खेत र जलबिद्युत आयोजना कटानबाट जोगिने अपेक्षा छ ।

मोदी गाउँपालिकामा सञ्चालित नयाँ मोदी–लेखनाथ १३२ केभीए प्रसारण लाइन आयोजनाले मोदीको खोला नियन्त्रणका लागि पर्खाल निर्माण गर्ने काम थालेको हो । आयोजनाको निर्माण ठेकेदार कम्पनी जेवीभी इन्डिया लिमिटेडले पातीचौरको सुन्चाप आसपासको बस्ती, पातीचौर बजार, पोखरा–बागलुङ राजमार्ग, तल्लो मोदी जलविद्युत आयोजना र पातीचौर–मैदान सडक समेत संरक्षण गर्ने गरी पर्खाल निर्माण गर्न शुरु गरेको हो ।

सुन्चापदेखि पातीचौर बजारसम्म नै जालीका ढुंगा भर्ने काम भइरहेको छ । पर्खा बनाएपछि वर्षाको समय आउने बाढीको दीर्घकालीन समाधान खोजेका मोदीवासीले अब कहिल्यै खोलाको ज्यादती सहन नपर्ने मोदी गाउँपालिकाका अध्यक्ष प्रेमप्रसाद पौडेलले बताउनुभयो । आयोजनाले १२ हजार घनमिटर जाली लगाएपछि आसपासको करिब तीन सय रोपनी खेतियोग्य जग्गासमेत संरक्षण हुने भएको छ ।